Aranzadi Zientzia Elkartea

Botanika Sailerako GIS azpiegitura (2023-2024)

Erronka:

Aranzadi Zientzia Elkarteko Botanika Sailaren erronka nagusia Euskal Herriko ondare botanikoaren ezagutza, kontserbazioa eta gizarteratzea da. Saileko teknikariek urteetan zehar aipatu ondareari buruzko datu base zabala sortu dute. Lan hori egiteko dagoeneko zaharkituta geratu diren tresna eta lan-metodologiak erabili dituzte. Aurreko urteetako lan andana datu base espazial eta erlazional batean sistematizatu eta berau bistaratu zein kudeatzeko behar nabarmena du elkarteak prozesuak optimizatu eta aurrerantzean lan-metodologia eraginkorragoekin aritzeko.

Soluzioa:

Aholkularitza lan zabal batekin abiatu da proiektua sailaren datu base ezberdinak sakonki aztertu, arazoak detektatu eta informazioaren migrazio metodologia egokiena zehazteko. Ondoren, Botanika Sailak urteetan landutako informazio korporatiboa landu, datu base espazial eta erlazional batean txertatu, eta saileko teknikarien behar konkretuen arabera programatu zein automatizatu dira hainbat kalkulu.

Datu espazial korporatiboak kudeatzeko mahaigaineko aplikazioa inplementatzearekin batera datu espazial horiek online bildu, kontsultatu eta kudeatzeko soluzio teknologikoa garatu da. Azkenik, saileko teknikariei GIS azpiegitura erabiltzeko eta geoprozesamendu ariketak egiteko formazioa eman zaie.